ما هي طرقك في كسر حالة الملل والروتين اليومي في حياتك العامة ؟
يعاني كثير من الناس من حالة الملل والروتين اليومي ، وخاصة بين الشباب والشابات ، ويتساءلون عن كيفية كسر حاجز الملل والخروج عن العادات اليومية المتكررة ، وهنا نطرح سؤال لكم أخواني وأخواتي ، فكل واحد منا لديه طريقة للقضاء على حالة الروتين ، فاخبرونا بها وشاركونا لتقديم الفائدة للجميع .
سيكون هناك موضوع خاصة بطرق كسر الملل ..:)
43 تعليق على: ملل .. ملل .. ملل
انا نفسي ابحث عن حلول ^^
مرحبا بك أخي ..
الحلول ستكون من الاخوة بارك الله فيهم ..
وسيكون لي موضوع مفصل عن كسر الملل ..
تابعنا وابقى معنا ..:)
فعلاً موضوع يحتاج النّقاش، لأن بالفعل هالشي منتشر وايد!!
الملل موجود في كل مكان لكن المشكلة هي كيف نتغلب على الملل، أممم بتكلم عن نفسي
لما أملّ أفتح اللاب توب و أتصفح النت، عندي روايَة أنجليزية أحاول أقراها مرّاتْ.
يعطيك العافية أخوي
حياك الله اخي ..
المشكلة ليست في الملل ..
بصراحة المشكلة فينا لأننا جعلنا الملل يتغلغل بداخلنا واستسلمنا لها بالرغم من وجود مليون طريقة لكسر الملل ..
اللاب توب طريقة …. والروايات طريقة آخرى .. وهناك المزيد وأكثر ..
بارك الله فيك ..
سأبحث معكم D:
تابعنا اخي الكريم .. وستجد المفيد ..
فذكر فإن الذكرى تنفع المؤمنين
ـــــــــــــــــــــــــــــــــــــــــــــــــــــ
بما يخص موضوع الملل؟ الملل موجود محد ينكر ذالك ولكن نبي نكسر الملل والملل يعتمد على الروتين اليومي
خذ مني الروتين اليومي؟ مايكسر الملل هو ذكر الله سبحانه وتعالى لأننا نسينا ذكر الله وهدي نبينا صابتنا حاله الملل وبعدين علينا بالتسبيح وقراءة القرآن الكريم وهم شي الاوراد الصباحيه والمسائيه { ألا بذكر الله تطمئن القلوب}
والمحافظه على الصلوات المكتوبه….
وفقكم الله لما يحبه ويرضاه
كلامك جميل اخوي ..
واتفق معاك ..
لكن في مجموعة تقول لك أن كل يوم اقرأ لكن بعده في شعور بالملل ..!!
شكرا لتواجدك ..
بارك الله فيك ..
مسا النور
الملل وطرق كسر الروتين اليومي
محاولة ممارسة الرياضة او احد الهوايات المفضلهـ
الاشتراك في احد البرامج التثقيفيه او التربوية او التطوعيه
محاولة الاشتراك في احد النوادي او المجالس هناااك العديد من الطرق
ولكن لمن يبحث ويحاااول الخروج من دائرة الملل
أجمل طرق كسر الملل هي الرياضة من وجهة نظري ..
فعلا تشعر بشعور رائع بعد عمل رياضي .. وخاصة المشي ..
فكرة جميلة الاشتراك في النوادي ..
بارك الله فيكِ اختااه ..
صبااااح الخير
الملل مافي مفر منه حتى لما تنوع في روتينك اليومي
إلا تييك حاالة ملل وتبي بس تيلس ماتسوي شي
لما أمل في كذا شغله اشغل نفسي فيها
احيانا أدش المطبخ واسوي طبخه يديده او سويت
واعزم هل البيت عسب يتجمعون ونيلس سواالف
وبكذا أغير جو
أيلس عالنت واشوف آخر الأخبار اللي تهمني من برامج وغيره
أكتب خواطر أو يومياتي
أقرى قرآن أو روايه أو خواطر غيري
أيلس عالتيفي ويا هلي
أظهر صوب ربيعاتي او السوق
أطور نفسي في هوايات أحبها مثل تعلم اللغات أو كتابة القصص
هههه كني صفيت قااائمه طويله
هاللي بالغالب اسويه وإذا مليت من كل شي أسير أرقد^^
السلام عليكم
الملل أصبح من أكبر منغصات الحياة، من منظوري الخاص أرى أن ممارسة الرياضة مع صديق أو مجموعة أصدقاء هي الأفضل لكسر الملل، إلى جانب تنوع النشاطات اليومية مع اختلافها، مثل مشاهدة الأفلام أو المسلسلات الأسبوعية، و مطالعة الكتب، مع الترويح عن النفس في أماكن مختلفة كالبحر مثلا…
دمتم في حفظ البارئ
أفكار جميلة منكم ..
الطبخ ومشـاهدة الأفلام وإيجاد نشاطات لكسر حالة الملل ..
بارك الله فيكم ..
وانتظروا موضوعي عن كسر الملل ولكن بطريقتي 🙂
وحياكم الله تعالى ..
القارئ .. لا يعرف الملل أبداً 🙂
+ يمكنك سد الفراغات بالآيفون أو الآيباد بكل خصائصه ومميزاته
صحيح ان القارئ لا يعرف الملل ..
ولكن ألن يكون يومه روتيني بكثرة القراءة ؟
الآي بادي والآي فون ..اعتقد الاهتمام الأكبر سيكون في مجال الالعاب ..
أخوي عبيد .. موضوع رائع .. بارك الله فيك ..
بس الظاهر تحسه كثير أو اللي حولك يعانون منه ولا ما كان أنطرح .. هههه بالنسبة لي اتمنى أعيش هالحالة خخخخ
لأني ما اعنيه منه من سنواااااااااااااااااااات طويلة جداً أنا بالأساس أريد وقت لنفسي ومب لاقية ..
أقولكم السر .. الحقيقي ، بيكون في خطوات ركزو فيها عدل بتفهمون قصدي والله يستر ما أنشر مقالة ألحين كالعادة بس أكتب أنسى نفسي بحاول أختصر ..
خلونا نعرف الملل : الملل هو أحساس ومشاعر مزعجة يتولد داخل النفس وتخليه لا هو عارف يقعد ولا يشتغل ولا ياكل ولا ينام لأنه يتحول لأرق ولا حتى ينجز .
بالبداية عليك تقعد في مكان فاضي ما في أحد ولو طلعت للبحر أو مقهى فاضي يكون أفضل ..
خذ دفتر وقلم ..
وأسرح وفكر .. أنت وش تسوي بيومك بالأساس ..
طيب كم ساعة تقضيها مشغول وكم ساعة فاضي ..
وأنتبه أما بتلاقي الملل بكل الأوقات وحتى أنت مشغول أو فقط في وقت الفراغ كل وحده لها حل ..
إذا كان الوقت منحصر بوقت الفراغ .. هذا يعني هذا الوقت يتكرر يومياً عندك بدون اضافة شئ جديد .
وإذا كان الملل متواجد بوقت العمل هذا يعني أنك تعيش روتين متسلسل بالعمل يخليك عاجز حتى عن أنجاز العمل اليومي بنفس الناتج المفترض .
الحل : بداخلك .. اسأل نفسك .
هل عندك هدف في حياتك يعني أنت .. عايش ليش بهالدنيا كمالة عدد يعني ولا ناوي تسوي شئ تستفيد منه وتفيد الغير فيه .
يعني بتعبير ثاني .. في مرة سرحة وتخيلت عمرك بعد شهر كيف بتكون طيب فكرة بعد ستة شهور طيب سنة ..
خطر على بالك أن الثانية اللي تمر بحياتك تنقص من عمرك وأنها ما بترجع .. خطر ببالك انك مثل رقم معين مسجل عند ربك وهذا الرقم قاعد يمشى بعد تنازلي كل ثانية بكل لحظة ولا يمكن ترجع فيه لورى ابداً .
خطر ببالك .. تفكر بغيرك شوي تمر الايام تسمع فلان زاد راتبه فلان عنده شغل خاص فيه فلان راجع من سفر فلان تزوج فلان بنى قصر فلان اشترى ارض فلان خلص شهادة الدكتوراه فلان نزل اسمه بالجريدة لانه افتتح اكبر مصنع على مستوى الشرق الأوسط .. الخ ..
تقدر تقولي لما تسمع هالشئ بشو تحس ولا شئ .. بس لما تنتهي السنة ساعتها تتلفت حولك وتذكر كل هالأشياء وتتحسر على نفسك وعلى مكانك وعلى قلة الحظ وعلى السنة اللي مضت مثلها مثل غيرها ..
طيب تعال ننقهر شوي على اعمارنا .. ونعيش التحدي .. وقول اوف مليت خلاص انا ناوي السنة الجاية اكون شخص ينذكر اسمه عند الناس بغبطة ..
شو وظيفتك شو مهامك اللي تسويها .. فكر هل مناسبة لطبيعتك يمكن مناسبة ويمكن لا تقدر تغيرها لشئ اكثر حركة اوكيه لكن ما قدرت تغيرها مب مشكلة .. أبدع ..
كلمة خلها ببالك دايماً .. وركز عليها .. انت وفلان وعلان تشتغلون بنفس المهام .. والنتيجة وحده عاجبك هالشئ ..
انك تكون مثل غيرك ..
انا ابصراحه لا .. بعمري وبحياتي كلها ما تمنت اكون مثل احد أذا احد وصل لشئ معين لمكان هذا يعتبر انجاز بالنسبة له لانه تعب ووصل .. وانت لما توصل مثل ما وصل بتكون مثل الببغاء تكرر انجازات غيرك .. وش الفايدة غيرك وصل وخذ الشكر واذا سويت مثله ما راح يوصلك نفس الصدى .. عليك يا بابا توصل للأبعد .. ساعتها بتحس بطعم الشئ اللي انت تسويه ..
يعني بختصار ربنا عطانا نعمة العقل .. شغله حرام تهلكه نوم ويأس .. وانت تقدر تدير عالم كامل وانت بمكانك ..
تميز بكل شئ بالشغل بالعطاء بالناتج بالانجاز بالافكار بالمقترحات وساعتها بتحس بطعم رائع غرييييييييييييب غير الملل بوقت الشغل ..
بوقت الفراغ عاد هذا بيصير مثل حكاية كان يا مكان في قديم الزمان .. التغير اللي صار بالعمل بيأثر على نفسك ويخليك تقول انا شخص حر .. وبتلاقي نفسك تنطلق من فكرة لفكرة من حلم لحلم ثاني من نجاح لنجاح واذا انوجد هذا النجاح بحياتك ..
بتقول ساعتها وش يعني الملل ههههههههههه .. اسمعه كنت من زمان بس معقول كنت انا جذي عدد زيادة بس على هالعالم سبحان الله ..
اخواني .. وسعوا مدار العقل وتذكروا ان دينا بحاجة لهمتنا أن بلادك محتاجة لعقلك .. في نشاطات وايد علمية ثقافية ما تحبها اوكيه رياضية شارك تميز .. في مشاركات بس مجرد دعم للمجتمع عن طريق المشاركة في تكاتف مثلا .. الجهات اللي تدعم المجتمع مثل كبار السن .. المعقوقين .. الايتام .. تدرون هذيلة الفئة اشكثر يحتاجون حب واهتمام ابنى عشانهم حلم يستفيدون منه او ادعمهم بزيارة او بأحتفال ..
اوووووووووف الوقت مر قلتلكم من قبل من اكتب ما راح تخلصون مني .. اتوقع وصلت لكم الفايدة .. اتمنى
السموحة .. على الإطالة .. مع الشكر اخوي عبيد على الرابط .. اللي خلاني اشوف هالموضوع الرائع واشارك فيه .. تحياتي ..
مرحبا باختي …
وحياج الله تعالى ..
أقل ما يُقال عن تعليقك درس مهمة في حياة أي انسـان ، كفيتي ووفيتي ، وأكثر ما أعجبني هو التسلسل في الحديث عن الملل ، حتى وصلتي لما ذكرتي أن الإنسان يجب أن يصل أبعد مما وصل إليه الآخرين …
كلام جميل جدا .. قرأته أكثر من مرة ..
ولكن ألا تعتقدين بالرغم من مشاغل الفرد والذي لا يجد وقت فراغ لأن نجده يتملل . هل للروتين علاقة قوية بالشعور بالملل رغم أننا لا نملك وقت فراغ لكي نشعر بالملل ..؟؟
بارك الله فيكِ ..
اهلا اخوي عبيد ،،
واشكرك على ردك الطيب …
بالنسبة للروتين والملل .. هما وجهين لعملة واحدة من وجهة نظري …
بس تعال وخلنا نفكر شوي لو الواحد حياته متسلسله شغل .. بيت .. عيال .. نوم .. اكل .. تبادل احاديث .. تيلفون للسلام عن فلان وعلان والاهل .. التخطيط للمستقبل .. السفر
متى بيلاقي الشخص وقت عشان يقول بخاطرة انا متملل ..
الملل اصله الفراغ .. والروتين صورة عاكسه فقط لا غير .. لان هذا الروتين من اللي اسسه الجيران ولا اصدقائي لا طبعا أنا …
الشغل .. عندي مهام متكرره صح روتين بس ليش ما ابتكر واطور مهامي واجدد نشاطها .. ليش ما اخطط لكم فكرة تخليني احب الدوام بدال ما اتملل منه .
البيت … عيال / زوج / زوجة / اهل / طيب كل اللي بقعد فيه معاهم كم ساعة وحده للاكل وبعدها بريح نص ساعة وبعدها بشوف من عندي بسولف معه من الاهل العيال مثلا عن دروسهم اشاركهم اهتماماتهم رسوماتهم احول تدريسهم لمتعه .. بعدها العب معاهم ورقة .. طاوله .. شطرنج ..
اشوف التلفزيون شوي ..
اطلع شوي مع الاهل الربع / الربيعات
اطلع للنادي / الصالون
وارجع ..
والله حتى انا احس احيانا بالملل .. بس دقايق اذكر عندي كتاب ما قريته .. او اذكر اني من زمان ما قعدت مع نفسي وعندي موسيقى كلاسك نفسي اسمعها واسرح فيها واحلم شوي .. اذكر اني صار لي فترة ما قريت من القرآن غير الاذكار ولايات نفسها اقوم اقراء … اذكر عندي ربيعات ما تواصلت معاهم من زمان … اذكر فلم كان نفسي اشوفه بالسينما وراح علي اقوم انزله من النت واتابعه … اذكر اني صار لي اسبوعين ما رحت الجم اقوم لابسه عباتي وطالعة …
في الف طريقة للي يبقى يعيش مرتاح .. اهم شي انه يكون عارف .. هدفه بالحياة .. وسبب وجوده .. وحاسس بقيمة الروح والوقت اللي يمر عليه ..
مع الشكر .. لتعليقك الرائع .. واتمنى اني اكون جاوبت على السؤال ..
رد جميل اختي الكريمة …
اعتقد أننا استفدنا كثيرا أنا والزوار مما ذكرتي …
وانا اتفق معاج في كل كلمة ذكرتيها ..
بارك الله فيج اختي ..
كلامج وااايد حلو اختي shalmansoori
ومن كثر ما عيبني كتبته في مفكرتي عسب لا مليت أرد له
لو انشغل الانسان في سبب وجوده في هالدنيا
والطرق اللي تؤدي به للمبتغى اللي كلنا نتمناه
ما لقى وقت للملل
ولو عرف أساسا شو يبغي
بس الكثير جاهل مراده ويكتفي انه يعيش روتين ممل
يوميا من دون تحقيق شي يذكر في حياته
اخوي .. عبيد و qala …
أشكر لكم أهتمامك بالرد والتفكير فيه ..
هذا يعطيني دافع عشان أقدم شئ افضل .. وحل خطير للقضاء على الملل .. بف باف بخصائص الخطيرة ههههههه
أخواني واخواتي ..
احد سمع عن قانون الجذب .. أحد عرف المعني الحقيقي له .. أحد فهم ليش الناس حايسه وراه ومفكرينه شئ جديد دخل العالم .. وهو بالنسبة لنا كمسلمين متعارف عليه بدينا ..
خلونا نخطط للعلاج .. أتوقع الهدف من طرح الموضوع .. هو أبعد من عرض تجارب الغير وملاحظات نقاط التشابه اللي تؤدي للملل ..
أكيد الهدف فهم السبب وإيجاد حل جذري .. صحيح ..
طيب بكل بساطة خلونا نسوي تمرين بسيط مع بعض ..
نجيب ورقتين وحده نكتب فيها كل لحظات الملل التي ذكرت هنا .. والثانية كل الحلول اللي ذكرت لتغطية حالة الملل ..
ركزوا .. شو قلت تغطية لأنها .. مجرد أمور تنتهي وبعدها يرجع الأنسان لنفس الحالة .. صحيح ..
اتوقع وصلت المعلومة بالنسبة لكم ..
بنلاحظ أخواني أننا نسوي جذي .. بعطيكم مثال ..
تخيل عندك غرفة .. صبغتها بلون طلع مغاير للون اللي تريده .. وتورط .. قمت قلت بخاطرك يا الله بمشي بكسره بلون الاثاث .. المخدات الستاير .. بأكسسوات الغرفه والسرير وغيرها ..
لفته حلوه .. القناعة كنز .. بس هل هذا يعني أنك تخلصت من اللون اللي على الجدار .. لااااااااااااااااااا أنت خففت من حدة اللون بتفعيل جوانب ثانية مجرد ما يمر وقت على هالجوانب بتصير ما تحس بوجودها وترجع تحس باللون وكأن الغرفه ما فيها أثاث ..
قول بغير مواقع الأثاث برجع ألعب بألون الستائر والفرش وغيرها ..
أنت شو قاعد تسوي بالضبط .. فكر ..
صرفت وقت وفلوس وتفكير وأنشغلت بشي ما يستاهل فعلا … مسوي عمرك مصمم ديكور .. واللي يعافيك ..
طلع هالأثاث وارجع أصبغ هالغرفة مره ثانية وأنتهى .. هذا هو الحل الجذري..
كل المهام اللي نخترعها عشان تغطية حالة الملل ما راح تفيد بشئ لأن الملل ما تغير بس غطيناه فترة .. سوينا أتفاقية هدنة بينا وبينه ..
طيب .. الحل …. أرجع أقول الهدف هو الحل ..
أوجد لنفسك مكان .. وبتنتهي من هالحالة تمام التمام ..
اقول أخواني .. السموحة إذا طولت عليكم .. بس ممكن ننزل موضوع عن عدد الأفراد اللي عايشين بهدف واللي ما عندهم هدف ..
وهل الكل يفهم معني الهدف ..
أتوقع أن الكثيرين عندهم … مشكلة بإيجاد الهدف .. وهذا السبب .. الرئيسي اللي أنا اشوفه أبصراحه ..
خلونا نخطي خطوة حقيقة نحو التخلص من الملل بدل ما نضيع وقت مثل الشواب ونشكى عن انواع والوان الملل ..
تحياتي ،،
والله يا خوي ممكن يكون كل شي متوفرلك واساسا وماعندك وقت للملل وملان ومو عارف ليه او ممكن لسبب انت اكتر واحد تعرفه ومو قادر تحكي لأي شخص فبتقول نفسيتي تعبانه من لملل والروتين انا هاد لي صاير فيني
اختي shalmansoori
اللي فهمت من كلامج ان الامور اللي نسويها مجرد تغطيه
للملل من دون ما نوجد حل فعال ونعرف السبب
مجرد تهرب من الحاله وابتداع حلول مؤقته
سرعان مانكتشف عدم فعاليتها
وممكن السبب مثل ما قلتي جهلنا لمعنى الهدف اساسا
باعتقادي لو كل شخص فينا عنده هدف حقيقي في حياته وعارف هدفه شو غايته منه
واشلون تحقيقه ما كان وجد وقت للملل وان وجد بتكون لحظات مؤقته وتعدي
اما بالنسبه للاقتراح اللي حطيتيه اتوقع الكثير بيظهر ماعندهم هدف محدد في حياتهم
تشوفيه يسعى هني يرجع يحول مناك ماله غاية محدده
او ممكن اقول جاهل اساسا هدفه وطرق الوصول له
والفئه الثانيه مكتفيه بالرقاد او مكتب وراتب يمشي هذا اقصى اهدافه
فئه قليله اللي تبدع ولها هدف معين في حياتها عارفه شو هو وشلون تسعى له
شو الحل برايك؟!
ايجاد هدف في حياتنا واذا ما عرفنا شو هدفنا اساسا او ماعرفنا الطرق اللي توصلنا له
شو الحل؟!
اتوقع اننا ندور عن اجابات وحلول اتمنى تفيدينا غلاي(:
وطولي قد ماتبي كلنا نبي الفايده^_^
هلا اخواني واخواتي ..
بعدكم ملااااااااااااااانين .. ولا شو القصة والله شكل الملل هو اللي بيمل منكم وبيهاجر …. ^ . ^ …
اقول بسكم نكد وملل وروتين .. قموا فزوا شوي .. تحركوا .. مد جسمك وانت واقف .. فج حلجك بإبتسامه عريضة ..
وشوف شو باقي لي السنة من شهور ..
وأكتب امنيات تتمنى أنك تحققها .. صفهم كلهم أمنيااااااااااااااااااااات يعني لا حد يقول يمكن يصير ولا ما يصير ..
أنا اقول تمنى بوعي وأحساس وحقيقة وتخيل الامنية لو صارت حقيقة ..
بعدها تعال عند كل وحده وفكر وقول بخاطرك .. لو كانت الضروف في صفي .. وتوفرت المعطيات اللي تدعمني عشان احقق هالأمنية .. فرضا .. بأي شهر تتوقع ممكن تتحقق لك …
بعد شهر شهرين ثلاث .. اكتب جنب كل وحده بعد ما تقيسها بخاطرك ..
بعدها أفرزهم خل اللي فترتها اقل فوق والاكثر تحت بالترتيب ..
بعدها خطط بإستمتاع .. يعني مب كأنك مدرس ولا دكتور بالاستراتيجية .. لا بإستمتاع ..
خذ دفتر رسم كبييييييييييير .. وسوي جدول حط الأماني بالطول فوق بعض اول سطر ..
وبالأسطر الباقية حط الاشهر من عند راس الصفحه فوق حط الشهور وقسم كل شهر لأربع اقسام ..
طيب الحين تذكر كل الاماني عشان تتحقق تحتاج فترة زمنية ..
ولما اخترت التوقيت لكل وحده منهم اخترتها على فرض أنك بديتها من الحين متى بتكون تحققت صح ..
يعني كل الاماني بتمشي بخط واحد مع بعض بتشتغل بس وحده بتحقق قبل الثانية وهكذا حسب دورها ..
طيب شوف الحين الامنية الاقرب شهر مثلا .. شو ممكن تحتاج عشان تحقق هذه الأمنية ..
اكتبهم صفهم وخلك واقعي ومتزن يعني ما في داعي تكتب كلام كثير وأفتراضات صخمة صعب تحقيقها وبعدها تقول ..
مستحيل قفلت ..
سهلها تسهل .. صعبها تصعب ..
تمام ..
بمركم بعدين .. لمزيد من التفاصيل في حال لقيت فيه رغبة من احد بالاستمرار بالتفصيل ..
وتبون الصدق .. اذا حددتم هدف مستحيل تنكسرون لين تحققونه مهما صار معاكم صدقوني عن تجربه .. ثقوا في أنفسكم .. وبربكم ..
السحر تراه فيك انت .. أنت اعجاز من ربك بحد ذاتك .. وعقلك أقوى برمجة بشرية على وجهه الأرض .. فلا ترتخي ..
وتخلي حياتك ماشية كأنك عدد زايد على هالدنيا ..
تحياتي ..
اخوي !
فيني ملل ملل ملل ملل ملل ملل ملل كل يوم
جننبي !!!
شنو اسوي !!
كل يوم نفس الوتين !!
تعب ملل ملل ملل
تحياتي
مرحبا باختي ..
يُمكنكِ قراءة الردود بالأعلى للاستفادة ..
أو قراءة الموضوع التالي :
http://www.3baid.com/?p=1187
واتمنى إن شاء الله تعالى يكون مفيد ..
ونحن مستعدين لتقديم الفائدة لكِ وجعل حياتكِ مليئة بالنشاط ..
وشكرا 🙂
اختي shalmansoori
كلماتج تثير فيني العزيمه
احب تلخيصج للأمور وتبسيطها
والدروس السهله على الرغم من بساطتها
بس لها تأثير كبير في حياتنا
لما طبقت اللي عطيتينا من امثله الحاله
المتأزمه عندنا من هالملل خفت واااايد
لان تم تحديد الأسباب والأهداف
والسعي وراها
بالبداية كنت احس بالملل بسرعه من الانشغال بالأمور الجديده
بحياتي واحس باشتياق للفراغ والجلسه مطولا عالتي في
وحاليا العكس صحيح اذا مر يومي من دوني ماسوي اللي اطمح
له او المخططات اللي مقررتها احس بقهر
وخاصه لما تحضرني هالجمله انت مجرد عدد عند ربك في عد تنازلي
كل يوم ينقضي ينقص هالعدد
لما أتخيل هالموضوع وانه هاليوم راح يروح ومايرد وينحسب من عمري المتبقي
أكيد ماريده يروح عالفاضي من دون ماستفيد منه
او اسوي ولو شي بسيط ينفعني دنيا واخره
حدوو امانيكم واهدافكم واللي تحبو تسووه في حياتكم
وتخيلو ان مافي باكر هذا اخر يوم لكم بالحياه شو راح تسووون؟!
أكيد راح تظهر الكثير من الامور تبون تحققوها وتنجزوها
ليش نستنا هاليوم يجي ونتحسر
دام بعدنا بصحتنا وشبابنا خلونا نستغل أوقاتنا
في شي ينفعنا في الدارين
بس المهم حط ببالك ورسخ بعقلك أنا ابي اتغير التغيير يبدأ من داخلك
أنا ابي اكون مفيد لنفسي ولغيري وحياتي لها معنى وراح تبدا عجلة التغيير
تتحرك وراح تصبح لحظات الملل معدوده عالاصابع
مو مسلسل ممل يتكرر يوميا
بس اسعو وجاهدو ^^
في انتظار تتمة حديثك اختي shalmansoori(:
اخواني وأخواتي ..
غاليتي qala …..
اشكرج فعلا على قدرتك على التفكير والتوقف .. اشكرج فعلا على عزيمتج بالحد من التمادي بالملل والحياة الفاضية ..
اشكرج بجد على تحليلك لتعليقي والتدبر بكل حرف وفهم المعاني التي بين السطور ..
هذا يدل على أنج تمتلكين حس واعي ورغبه بالتغيير .. ربي يسعدج دوم ..
كنت اتمنى من كل المشاركين اللي يحسون بالملل .. يتوقفون للحظات بسيطة .. ويقرؤن اللي أنكتب من خلال مناقشة
هذا الموضوع ..
أخواني انتوا لما تدخلون وتقولون ملل .. ضايقجييين .. هل الهدف أو البوح بالهم والطفر بس .. ام الرغبة بتغيير الملل ..
اتمنى كل واحد يسأل نفسه هالسؤال بالأول ..
إذا كان الجواب الأول .. فالسموحه إذا كنا نحاول إستيقافكم للمناقشة ..
أما إذا الجواب كان الثاني … فأتمنى التحلي بالصبر .. لو قليلاً .. لأن المفتاح الذهبي لوقف الملل موجود .. عندي
واللي فعلاً يتمنى التغيير .. يلتزم ببعض الخطوات البسيطة .. ويشوف بنفسه .. عط نفسك فرصه ..
تحمل شوي وقارن الأحاسيس قبل وبعد .. وأختار الأريح لك .. قناعتك .. هي اللي تحدد رغبتك .. مب خطوات التخلص من الملل تذكر هذا الشي ..
بالبداية احب اعرفكم بنفسي شوي
خبيرة معتمدة من الأتحاد العالمي لتطوير مسارات الطاقة للعلاج بتقنية الحرية النفسية EFT
ممارسه محترفة من البورد الامريكي بالبرمجة اللغوية العصبية
ممارسه محترفة من الاتحاد الامريكي للعلاج بعلوم الطاقة
دبلوم معتمد بعلوم طاقة الهرم والبندول
واخيرا .. مدربه محترفة ومعتمدة ..
أخواني .. النقاط اللي ذكرتها فوق ليست من باب التفاخر بالذات .. ولا كنت كتبتها بتوقيعي من أول ما سجلت بالمدونه
كتبتها قلت يمكن تكون السبب لزرع الثقة بالبعض عند قرائتهم لبعض الحلول .. ويثقون تماما أن الحلول اللي اكتبها ليست
حلول بسبب الخبرة والتجربه فقط .. انما حلول مدروسه بعد علمياً ومنطقياً ..
وعلى أساسها في حال الرغبة بالتغيير الفعلي والتطبيق .. يستحيل يجيني يوم شخص ويقولي ما نفع معاي
التغيير .. وأنه طبق من زمان بس ما في فايدة ..
رب العالمين قال في كتابه بالكريم ﴿إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِم﴾ .. الرعد
يعني التغيير الذاتي والرغبة هي الأساس ..
قوله تعالى: (عَسَى رَبُّكُمْ أَنْ يَرْحَمَكُمْ وَإِنْ عُدْتُمْ عُدْنَا) .. الإسراء
يعني مب التغيير السطحي فقط يعني اليوم وباجر وبعدها عودة للماضي ويرجع يقول الواحد ملل أنا سويت وسويت وسويت بس ما في فايدة ..
كلمة بخاطري اقولها للجميع بأذنه ” هل أنت فعلا طبقة وأنت مقتنع .. هل أنت فعلا تريد تتغير .. أنت فعلا تستمر من خاطرك وقلبك بدون ضغوط خارجية .. هل أنت حاسس بأهمية الخروج من دائرة الملل .. هل أنت جااااااااااااااااااد ” ..
إذا لا يمكن .. ما تحس أنك أنسان متملل .. بعد اليوم
تعالوا ناخذ الموضوع بجد أكثر ومن نواحي علمية عشان نشوف الحل ..
المشكلة : الملل
تعريف الملل أكيد بيكون واضح لو جينا ونظرنا للمعني الحقيقي لعكس الملل وهو يختلف من شخص لشخص حسب نظرته لمعني الملل ..
طيب شو عكس الملل : نحط أكثر من معني عشان تتناسب مع وجهات نظر مختلفة ..
الملل : إحساس بالغراغ
الملل : المضي باليوم دون أن يطرآ أي تغيير عليه
الملل : أحساس بالهم أو بالمشكلة وعدم قدرتك على حلها والمضي بمآآآسيها
الملل : هو يوم فاضي ما له معني حقيقي
الملل : هو احساس بأنه ما لك وجود
الملل : هو تعب من الوقت اللي يمشي ثقيل
الملل : هروبك اليومي لساعات طويله بالنوم وبالنهار خاصة
الملل : ارهاق وآلام نفسية وجسدية مالها مجهود جسدي أنما مجهود عقلي فقط أنه مب قاعد تسوي شي بالاساس
أكيد في كثييييييييييييييييير من التعريفات للتعبير فيه عن الملل حطيت اللي يخطر ببالي .. بس الأهم
كل واحد يقراء تفسير الملل ويشوف وش الكلمة أو المعني المشترك بينهم ..
وقت فاضي
عدم وجود طعم للأنجاز أثناء العمل
عدم وجود حل للمشاكل وجعلها تعكر حياتنا الحاضرة والمستقبلية ونحن متقبلين على مضض
عدم وجود سبب حقيقي للحياة
عدم وجود أمل يعين الانسان عشانه
عدم وجود هدف
عدم وجود رؤية واضحة للكثيرين عن سبب وجودهم بالدنيا
عدم فهم البعض لمعاني الحياة الحقيقة ..
الإحساس بقلة قيمة الفرد
عدم فهم قيمة الوقت .. ويعتبر الواحد أنها مجرد ساعات ثقيله على نفسه بتنتهي بالنوم ويرتاح .. هذا هروب لقلة همته
قلة الوعي والإدراك
عدم وجود طموح حقيقي .. وصورة حقيقة يرسمها الفرد لنفسه كهدف يصل له
كثييييييييييييييييره المعاني اللي ممكن نستنتجها من سبب وجود الملل ..
والحين بخليكم .. تفكرون بمعني الملل .. ومصارحة كل فرد نفسه بالسبب الحقيقي .. والتفكير هل هو مستعد أنه
يتغير ..
فكر ..
هل تمتلك الهمة
هل أنت مستعد
هل فعلا تريد تكون أنسان ثاني
ممكن يكون الجواب نعم .. بسسسسسسسس يحس الواحد أصلاً بالكسل من التفكير حتى .. فرق ملل ولا كسل بالتحرك
جاوب بصدق مع نفسك ..
وأنا على إستعداد لتقديم الدعم والمشوره بأي وقت .. بأنتظار الردود
تحياتي للجميع ..
شكرًا لكي اختي shalmansoori
أحرجتيني بكلامك>>>
ما أنا سوى شخص يريد التغيير وان
تكون حياتي ذا معنى
وكثير تحصلي نفس الحكي
بس مو عارفين شو نسوي
بعد ما مشيت في خطوات النجاح للأخ عبيد
وقريت الامثله الحلوه للتغلب عالملل اللي كتبتيها
الحمدالله بديت أخطو للأمام
مانكر ان الملل ساعات يجيني وهذا شي طبيعي
بس مو شرات قبل اغلب الاوقااات ملل ضرب ملل
اذا جا وصار مو وااايد والحمدالله بسبب
الضغط على نفسي احيانا
فانصح إخواني وأخواتي اذا بدو في التغيير
لا تضغطو على نفسكم بزيااده لدرجة تحسو
بالسأم من هالموضوع امشو مع نفسكم خطوه خطوه
ما حققتو هالأمر اليوم او ما صار شرات التخطيط اللي
حااطينه مايخالف لا تقسو نفسكم هالمره يا نفسي
مانجزتي المره اليايه أنا وااااثقه انك بتنجزين وبتحرزي
تقدم دايمااااً اعطو نفسكم نفحات إيجابيه ودعم للتقدم
مافي شي يتغير بين ليله وضحاها
كل شي في الدنيا يباله وقت وتغييرك لنفسك
والتخلص من الملل يباله وقت وعزيمة
وإراده
كثيره اسباب الملل مثل ما نذكر
بس المهم الشخص يحدد سببه الاساسي
يخصص وقت لنفسه للمصارحه
أنا ليش ملان؟؟
شو السبب الرئيسي؟؟
شو ممكن اسوي عسب اتغلب على هالملل؟؟
عندي قدرة التغيير والإمكانيات ؟؟
وصدقني راح تلاقي هالقدره اذا بحثت
عنها بجهد
اذا قررت وعزمت بكل صدق وثبات ويقين
راح تتعرض ممكن للسخرية بالسعي وراح أحلام معينه
مازال البعض من الافراد يرفضها
او الانتقاد او تكسير مجاديفك شرات مانقول من بدايتها
بس حط براسك أنا نويت التغيير وماراح حد يسلبني
حلمي او هدفي
امشي وامضي ورا مبتغاك وقبل كل شي حدد هدفك اساسا بالحياه
وخطوات النجاح اللي كاتبها الاخ عبيد راح تفيدكم بذن الله
خاااصه الخطوه ٣ بالنسبه للكشف عن إمكانياتكم^^
والأمثلة اللي حاطتنها اختنا shalmansoori
دروس ممتعه لو طبقت وتأثيرها راح تلاحظوه أنتو بأنفسكم
بس عزمو وتوكلو
والله يجزيك خير اختي shalmansoori
اتمنى تكملي ما بديتي فكلي اهتمام بحديثك ^^
مرحبا
امممم من ناحيتي فاوقاتي
1- ايلس دووم مع ماماتي ونسولف وضحكها كم تسوى لي ضحكتها ونشوف التلفزيون
2-زيارت الاهل خصوصا عمتي فديتها
3- احيانا الطبخ بس طبخه يديده وطبعا تظهر لذيذه لووووول
4-اتصالات مع الاهل والاصدقاء
5-قراءة القران
6-الانترنت
7-قراءة كتب خصوصا هالفترة احاول احسن لغتي فالانقلش
8-احيانا قراءة الجرائد
9-التسبيح وذكر الله
10-احيانا الرياضه والرقص لووول
11-وطبعا اي مناسبه عزيمه سواء تخرج ,ميلاد ,طلوع,رجعت سفر,اي شي احاول استغله ونسوي عزيمه بارتي صغيرة بين الاهل
12-طلعة في ويك اند بحر (سباحة شوي صيد سمج وخصوصا هالفترة حابة اتعلم واوني ماخذه سناره هع) او بنسير جزر وخصوصا جزيرة الفطيسي روعه مع الاهل
ووووووووووووووايد اشيه
والحمدلله ان شالله افدتكم
شي جميل اختي الكريمة …
يعني ما عندج ملل .. 🙂 أو لستِ ممن يُعانون من الملل ..
أفكار وأنشطة جميلة بارك الله فيكِ ..
لن اعلق على من قبلي شمسة والغلا ، فحديثكم مليئ بالفوائد …
بارك الله فيكم جميعا ..
من احس ملل اطلع يمين يسار اطلع من الساعه 4:00 العصر ارجع 9:00 اليل
العب كوره ويش عندك اتمسخر على الي تجلس معهم روح محل حتى لو ماعندك فلوس اسائل هذا الشي بكم روح كرنيش عند البحر خد حجر واجد واجد ورمي في البحر ارسم واذا رجعت البيت و عندك بعد ملل جسب لك حطب وشدخ اخترع يا اخي
مقترح جميل اخوي 🙂
وفقك الله 🙂
شكرا لكم
مدونةجميلة
شكرا لكم .. تواجدكم أجمل ..
تدوينة اكثر من رائعة
جزاك الله خيرا
حياك الله اخي ..
بارك الله فيكم ..
السلام عليكم ،،
ولله شفت اليوم ايميل من المدونه على موضوع الملل .. قلت بخاطري بل .. بعدهم الربع ملانين .. هههههههه من السنة اللي طافت ..
على العموم انا حبيت امر واسلم على الجميع .. ابصراحة وقتي ضيق شغل ودراسة وتدريب وبلااااااااااوي وراي .. ما عندي ملل الحمد لله ..
اللي بعده ملان اقوله تعوذ من ابليس ولف شوي بالسيارة وساعد الناس اللي يحتاجون .. هذي ساعتين طارت بالعبادة والحسنات ..
تحياتي ،،
وعليكم السلام ..
شكرا على مرورج أختي ..
بعدنا يالسين نحاول نمسح كلمة ملل من قاموس الربع ..
دعواتج لنا ..
ومثل ما قلتي : تعوذ من أبليس ولفة بسيارة ….إلخ
بس لازم يعرفون شيء مهم أن الملل هم السبب فيه مش حد ثاني .. 🙂
شكرا ..
صدددك مللل والله شسوي
انا تعبت من الملل نفسيتي تعبانه
مليت من البيت بدون وظيفه وبدون هدف
حاسه باكتئاب ودي حياتي توقف وارتاح
دائما الشخص الرياضي لا بصاب بالملل لانة يريد ان يتميز فى مجال رياضتة فيصبح لدية شغف باللعبة واصرار ودائما مايتمرن فلايصاب بالملل كثيرا
صدقني وعن تجربة افضل طريقة لكسر الروتين والملل انك تجرب حاجات جديدة ومجنونة 😀
انا مثلاً مرة كنت قاعد على قهوة الساعة 10 بالليل ومعيش غير 55 جنيه في جيبي فجأة قررت انزل القاهرة ( مع العلم اني من اسكندرية ) وفعلاً ركبت مواصلة للقاهرة كلفتني 40 جنيه يعني نزلت بلد غريبة بالنسبة لي ومعيش غير 15 جنيه هههههه بس كانت تجربة جميلة جداً وخرجت منها فرحان ومش حاسس بالملل الطبيعي بتاع كل يوم